家家日日玩  家居遊戲系列

C01-C06 露營遊戲系列

點樣可以喺屋企旅行瞓帳幕?日頭動起來,夜晚喺帳幕裏過夜?

你可以利用家中飯廰嘅有柄櫈,加上床單或大毛巾係上面,搞掂! 

大家亦都可以喺睡床上,用枕頭等物件疊高放喺床頭和床尾,上面加張床單,得左!

一於自創你屋企嘅特色帳篷啦!

💡 遊戲心得

只要動下腦筋,屋企都可以變做不同場景,同小朋友一齊做啲有趣主題活動。

同小朋友一齊發揮大家無限的想像力,可以將一切變得有可能。

💡 遊戲心得


媽媽清楚介紹每隻手指嘅名稱,令小朋友不知不覺學到嘢。大家不妨試吓唔用數字,改用手指名稱,都非常考腦筋㗎!
 

家長分享

 

家姐將帳幕分為四個角,一邊係扮靚區,一邊係廚房區,一邊係細佬嘅專區。

遊戲心得

 

家長只需提供一張床單或一條大毛巾,就可以把玩嘅場景,由屋企變成戶外,變化萬千。

可以畫低呢次獨一無二的「自家營」,同小朋友一齊回味當中樂趣。

原來執背囊都可以好好玩?仲考埋你嘅應變能力。

請小朋友準備好自己嘅隨身小背囊,由佢諗吓需要帶嘅十樣物品,你估佢哋會帶乜?

你亦可以問吓佢點解要帶嗰件物品,如果冇,可以搵乜代替。

帳幕諗掂喇,背囊執好,點樣搭車又搭船?

💡 遊戲心得

『日常生活有好多小難題,其實可以透過不同遊戲,俾佢哋嘗試解決,刺激思維!』

小朋友都有好多搭交通工具嘅經驗,所以我哋可以問吓小朋友:「想搭乜呀?係點搭架?有乜特別嘅地方?」

佢哋之後可能會話你知:「搭車要嘟咭/ 搭 daddy 車要扣安全帶/ 搭船要上落踏板/ 搭飛機有飛機餐食…… 」

「哦,咁即係應該點做呀?」

之後請佢示範一次應該點做,小朋友會非常樂意話你知,同你一切去做!你只要投入同跟住做,再問吓到咗未,咁你哋就自然會到達營地。

去到目的地之後做乜好?

💡 遊戲心得

找回你嘅童心,盡情跟隨孩子去遊戲,一同去經歷!

今次同大家喺屋企實行『越野賽大冒險』

最近大家都可能做少咗運動,不過冇有怕,因為喺屋企都可以流汗。我哋可以善用家中物件,設定成為障礙物,以不同方式越過呢啲物件。

就俾少少提示大家,你哋再因應自家環境去設計啦!當然,最重要係同小朋友一齊定規則,咁大家就會樂意去遵守喇!

紙巾盒 - 要跳過去

櫈仔 - 要圍著轉兩個圈

梳化前 - 要爬著前進

睡床 - 要由床頭滾到頭尾

拖鞋 - 要按擺放方向單/雙腳跳

咕𠱸 - 瞓上去扮游水

好似仲未煮野食,又未喺郊外過夜添~ 

大家準備好攞起電筒同我一齊做偵探未呢?

咦,早兩日去露營之前,我明明執好咗我最鍾意食嘅蘋果,同最愛著嘅黑色風褸喎,點解唔見嘅?唔通係俾百厭嘅馬騮仔收埋咗?

💡 遊戲心得

家長可以先簡單收起1-2樣物件,然後視乎情況增加難度。

輪流做馬騮和偵探角色,你考考佢時,佢又考番你!

煮個即食麵要3分鐘,究夠竟3分鐘有幾長呢?一齊嚟計時啦!

首先運用你嘅想像力,搭個火爐同準備啲炭先。(俾30 秒你諗吓。好,開始計時!)

好多時我哋叫小朋友『等一陣』,咁到底一陣即係幾耐呢? 我哋可以善用計時器,同小朋友一齊感受吓真正嘅時間。

先從5秒鐘開始,睇吓邊個估計得最準確!

就好似要唱幾多首歌先可以有得食即食麵 (3分鐘) 呀!

露營食飽飽之後,梗係要去參加營火舞會啦,喺好遠好遠已經聽到啲好有節奏感嘅音樂啦。

走到埋去至發現,原來呢個營火舞會同平時嘅唔同架,又要自創舞步,又要記得人哋嘅動作,真係好刺激呀!

食咗嘢又開埋營火會,一齊睇星星先。

咦,啲星星喺邊度呢?

大家可以先熄咗屋企啲燈,跟住瞓入帳幕裡面,再用電筒照向帳篷,咁就有發光星星,你仲可以開開閂閂,咁啲星星仲會識得閃添。

瞓喺個帳幕時,大家仲可以扮睇緊動物,講佢嘅特徵出嚟俾其他人去估!

「我見到一隻動物,佢係 『黑色長毛嘅,會用對手揼自己心口嘅』,你估係乜?」

欣賞讚許

過程中家姐負責煮食物,細佬都有幫手攞餸開飯,互相合作。

到咗瞓覺時間,咦,個帳篷唔夠位點算好?呀,家姐諗到好辨法去解難,好叻叻

💡 遊戲心得

玩嘅過程,唔同突發狀況都可能會出現,就需要有一定解難嘅能力,咁平時玩多啲,就可以預習下點樣去解決問題啦。

​關於我們

由香港賽馬會慈善信託基金捐助、香港大學教育學院 融合與特殊教育研究發展中心推行的賽馬會「玩學相長」計劃,是一個社交情緒學習項目,並源自於一項已有效實施了十多年的社交能力影響研究計劃。賽馬會「玩學相長」計劃旨在支援家長和教師成為變革推動者,透過在不同環境中進行的面對面互動遊戲,促進孩子的社交技能和情感發展。項目已在幼稚園進行,並推廣至家庭和社區。

​互動遊戲經驗分享平台

© 2020 by Jockey Club "Play n Gain" Project

聯絡我們

電話 :  (852) 4610 2400

電郵 :   jcplayngain@hku.hk

主辦機構 :

​捐助機構 :